غير متصل
لما بشوف الناس اللى بتشتكى من زن العيال ودوشتهم وشقاوتهم
بفتكر كلمة قالهالى دكتور أحمد خالد توفيق عن الأطفال :
الجري وراهم أحسن من الجري بيهم
اللى عنده طفل سليم معافى مهما زن ومهما جرى وراه وهو جوه بيته
يصلى ركعتين شكر ويحمد ربنا كتير..
أفتكر إن فيه ناس مقضية عمرها تجرى بيهم عالسكك بين المستشفيات
وفيه ناس بتدفن عيالها بإيدها وتروح البيت تندبح بسكين الذكريات
فيه أمهات بطلات مجاهدات بتجرى بإبنها اللي عنده إعاقة خصوصاً الإعاقة الذهنية اللي مايعرفهاش
ولا بيضحكلها ولا بيكلمها ورغم دا ماسكة فيه ومابتطيقش عليه الهوا ولا تتمنى ترتاح من
تعبها معاه لإن عندهم أسمى شعور إنسانى فى الكون...
عشت عشر سنين في وسط الأمهات دي
منهم أم ما أنساش كلمتها بعد ما إبنها "المُبتلى ذهنياً"وصل تلاتين سنة
و هي لسة بتجري بيه وتقول :
طب بس يضحكلى ضحكة واحدة قبل ما أموت..
طب يعرفنى بس ويعرف إنى عشت جنبه وماسيبتوش ..
طب ما يضحكش بس ربنا يمد فى عمرى عشان ما أسيبهوش لحد يبهدله بعد ما أموت..
لو إبنك في حضنك وبيبتسملك وبتتكلم معاه بس تاعبك ومغلبك
و مجريك وراه ، أحمد ربنا كتير إنك مش بتجرى بيه
إفهم إنك فى نعمة كبيرة قوى تستحق الشكر الوفير
كتبه : محمود أبو العزم
التعديل الأخير بواسطة المشرف:
