الحقوني ياشباب الاجازة خلصت اعمل ايه مش عاوز اروح المدرسة بجد مش عاوز!

[MagicianMiDo32]

النجدة ياعالم الحقوني ياهو
يارجالة
الاجازة ح تخلص بكرة
وهنبدأ الدروس
اعمل ايه
بجد بجد مش عاوز اذاكر زهقت م المذاكرة
وبعدين في مصر الي ذاكر زي الي مذاكرش كله واحد
ياجماعة معملتش اي انجازات في الاجازة دي معملتش حاجة خالص خالص

ما استفدتش باي شكل كان
وكان عندي كتاب عاوز اقرأه ومكملتوش
معملتش اي تقدم خالص
لا اتعلمت لغة برمجة ولا اي حاجة
انا كنت عامل حسابي البلد هتولع زي السنة الي فاتت ويزودو الاجازة
لكن لاول مرة مكتوبلها الخير!
الحقوني ياجماعة النهاردة آخر يوم
وانا بصراحة اوفر خالص
ماذا افعل
حنرجع للمدرسة والقرف تاني
ومعنتش هدخل ع المنتدی ولا اسمع تلفزيون
ولا حتی الف مع صحابي
ان الملل قادم
والمدرسين ولاد الايه صعبان عليهم الشهر ومصممين يبدأو دروس من بكرة
و هنرجع للمدرسة والملل بتاع المدرسين
عندنا مدير رخم كدا بيخلينا نحضر بالعافية ومبنعرفش نزوغ م الفسحة علشان بيبقو مراقبين السور
مش مشكلة مش عاوز اشتغل
المشكلة ان المدرسين في المدرسة مبيشرحوش
يخش يسأل ويتفزلك علينا شوية ويقعد يهزر
وبصراحة هزارهم بيييييييض بمعني الكلمة
ولازم اروح الساعة 2
طب بروح انام
لأ يا اخويا
بروح الدروس علشان الباش مهندس بتاع المدرسة مبيشرحش
ليه
بيدي درس بره يشرح في المدرسة ليه
ما مرتب المدرسة ضامنه ضامنه يتعب نفسه ليه
واقعد الف ع الدروس لحد الساعة 7
ارجع البيت
اقعد ع العشا الي هو الفطار لان طبعا مببقاش فاضي افطر
واروح ورايا كوم واجب ومذاكرة في الدروس
اقعد احل فيه لحد الساعة 2 بالليل
واصحی تاني يوم الساعة6 علشان اروح المدرسة
المدرسة بقت عبء يا اخي
تضييع للوقت وخلاص
والمناهج كله حفظ حفظ
احفظ الي ف الكتاب وروح سمعه للاستاذ وخلاص
وتروح الامتحان تنساه
وفالآخر تخش كلية تجارة وتقعد ع القهاوي زي بقية الشعب
في حين ان الطالب في الدول الاجنبية
يصحی الصبح يفطر ويروح المدرسة
المدرس يشرحله ويفهمه
وكل شغلهم عملي وممتع
والمهم يرجع البيت
يقعد يلعب وقبل النوم يدوبك يذاكر ساعتين بالكتير وخلاص
وفالآخر البيه يطلع مهندس ولا دكتور
وانا اخش تجارة
وفي الآخر
ويقول عليا دول عالم ثالث

بالزمة مش كدا حرام
بس يلا علی الاقل انا احسن من غيري

 

[أحمد بدر الدين]

هههههههههههههههههه معلشي ياعم سيبها علي الله وزاكر وربنا معاك والله وحشتني ايام المدرسه انت في ثانويه عامه ولا ايه ربنا معاك ياغالي هتوحشنا

 

[Dz_zYz0]

هههههه . زهقت من الدراسة . سهلللللللللة . وقف الدراسة
دي هي الاجازة اصلا متعتها كلها ساعة. و دا اللى يخليها حلوة دايما
توكل على الله في الدراسة . و ما تدري . لعل الله بك للعباد نافع

 

[m_uons2002m_uons2002 is verified member.]

عندك 114 سنه ولسه بتروح المدرسه

اللي زيك اتخرجووو من يجي 90 سنه

المدرسه متعتها تقابل اصحابك

وتضربو بعض بالكتب

وتلعبو بالاقلام

وتعملو مقالب في بعض


واييه تاني ياتري . . . . . . . . اه افتكرت


وتزاكرو شويه ​

 

[MagicianMiDo32]

ما انتو مخلصين بقی مش عارفين المعاناة الي بنعانيها

عندك 114 سنه ولسه بتروح المدرسه

اللي زيك اتخرجووو من يجي 90 سنه

مشاهدة المرفق 74969

المدرسه متعتها تقابل اصحابك

وتضربو بعض بالكتب

وتلعبو بالاقلام

وتعملو مقالب في بعض

واييه تاني ياتري . . . . . . . . اه افتكرت

وتزاكرو شويه ​

ههههه
ما اصلي قعدت ف الحضانة 100 سنة
انا الكائن الوحيد في العالم الي سقط فأولی حضانة وتانية حضانة كمان
بصراحة كانت اصعب سنة في حياتي
خصوصا السؤآل بتاع عد التفاح دا
كان سؤآل صعب جدا
يا ابله دا مش تفاح دا طماطم
التفاح بيبقی لونه احمر كدا ........وشبه التفاح
كانت اسؤأ ايام حياتي
ولا فكرتوني لما قريت كتاب الديناميكا الهوائية بتاع الحج
رحت جبت كيسين بلاستيك والا انط م البلكونة علشان اطير
بس منهم لله لحقوني فآخر لحظة كان زماني طرت
رحت بقی اعدت المحاولة
عملت شوية طيارات ورق ولزقتهم ف ايدي ورحت اطير
بس مطرتش للاسف
كا فيه قزاز ع الارض خفت اهبط عليه اصل الطائرة تتحطم
وآخر مرة طرت فيها كانت ف اولی اعدادي
لما جربت اتعلم باركور
فطيت من الدور الاول كذا مرة وعادي يعني
محصليش حاجة
صحيت الصبح لقيت رجلي بتوجعني
شكلي كسرت صابع رجلي الكبير
او تقريبا حاجة ف الوتر كدا

طبعا بعد الطيران قررت ادخل ف الكومبيوتر
المهم مرة فامان الله وانا بلعب لعبة army men
الفارة وقفت
والاعداء هجموا عليا
قمت جبت الكيسة وجربت اصلح الفارة
الفارة اشتغلت
بس الباور سبلاي اتحرق

ومرة كان الجهاز بطيئ مووووووت
سألت خالي قالي الهارد بيسخن وفيه حكه
فكرت انا بقی
رحت جايب الهارد وحطيته ف الثلاجة
مش في التلاجة يارب لأ في الديب فريزر
تفتكرو نطق بعدها

ههههههه كانت ايام