King max
زيزوومي جديد
- إنضم
- 2 يوليو 2009
- المشاركات
- 69
- مستوى التفاعل
- 11
- النقاط
- 90
غير متصل
بسم الله الرحمن الرحيم
_________________
الاقلاع عن التدخين خطوة يتخيل معظم المدخنين استحالتها ومما لا شك فيه ان التدخين عادة واحتياج نفسى اكثر منه عضوى واى عادة فى الدنيا يمكن الاقلاع عنها اذا شئنا واعنى بشئنا ان تكون لدينا الرغبة الحقيقية فى الاقلاع عن تلك العادة وليست مجرد كلمة تخرج من افواهنا بدون ان تتوفر النية لذلك
- فاذا توفرت عدة معطيات تقول
1- التدخين حرام شرعا
2- السجاير تحتوى على مواد مسرطنة
3- السجاير تسسبب ارتفاع ضغط الدم
4- السجاير تقلل قدرة الجسم على الاستفادة من الاكسجين
5- السجاير تسبب الضعف الجنسى نتيجة تغيرات تحدث فى الاوعية الدموية الموصلة للاعضاء التناسلية
6- السجاير تضر عائلتك لان اطفالك والمحيطين بك يدخنون تدخين سلبى والنسبة التى تصلهم هى 85بالمائة من كل سجارة انت تدخنها
7- المدخن يصاب بكهولة مبكرة
8-المدخن انسان سريع الغضب وذلك لان السجاير تحتوى على الادرينالين والادرينالين مادة يفرزها الجسم وقت الفزع او الخوف وتسمى هرمون الفزع واكيد سمعتم عن مثل يقول ده فلان مات من الخضة وده نتيجة افراز هرمون الادرينالين يعمل انقباض فى الاوعية الدوية ويزيد دقات القلب ويرفع ضغط الدم
9- المدخن اكثر عرضة لامراض القلب
ياربى كل ده فى سيجارة
طيب لو كانو عشرين
طيب لو اربعين
طيب لو خمسين
طيب ما تيجو اقولكم انا بطلت سجاير ازاى
ولا اقولكم انا اصلا بدات ادخن ازاى
جدتى كانت مدخنة ولان دى كانت موضة فى الصالونات اللى الستات كانو بيقابلو بعض فيها زمان وقت الاحتلال الانجليزى لمصر ماهى جدتى كانت من زمان ههههه فطلعت شايفة ان ده شئ عادى بس لما كبرت شوية ومن الله عليه بالالتزام كنت اكره التدخين جدا لدرجة ان لما كان يتقدم لخطبتى شخص اسال الاول لو مدخن يبقى مرفوض ولكن اللى حصل انى اتجوزت مدخن على امل انى اخليه يبطل وكنت اتضايق جدا من دخان سجايره واتخنق بس سلبيتى وقعدتى جنبه وهو بيدخن خلتنى ادخن سلبى وبعد كده بقى ايجابى
ومن مجرد انها لعبة فى الاول زى ما بيدخلها كل المدخنين بتصير اعتماد جسدى وادمان وفوق كل ده عادة يعنى مثلا مكنتش اعرف اسوق مسافات طويلة من غير سجاير لانى كنت بانام وانا سايقة والسجاير تصحصح
بتتعود انك فى اوقات معينة وفى مواقف معينة تجرى على السيجارة
وخاصة فى اوقات الضيق او الظروف النفسية الصعبة
ولكن
لما بنتى ابتدت تكبر كنت اخاف ادخن امامها ازاى ادخن قدامها وارجع اقولها التدخين حرام او التدخين مضر بالصحة يبقى اخدت قرار انى اتكسف على دمى وابطل
ازاى
تعالو احكيلكم
بنستبدل مواد بمواد اخرى
يعنى اول يوم اقلاع بيكون اصعب وبتقل الصعوبة يوم بعد يوم لان السجاير بتوقف افراز مواد معينة من الجسم اعتمادا على انك بتاخدها من مصدر خارجى وهو التدخين وهى دى فكرة الادمان
يعنى فى مواد اسمها الاندروفين بتتفرز فى الجسم لما بناخدها من حبوب مثلا الجسم بيوقف افرازها و لو وقفت الحبوب تشعر بالالم لان المواد المسكنة للالم اللى ربنا جعلها تتفرزلك طبيعى وقفت بتناولك الحبوب دى يبقى بس محتاجين شوية وقت على ما الجسم يتنبه وبرجع يفرز المواد دى تانى وبصورة طبيعية ومنتظمة
يبقى عاوزين نوقف النيكوتين
محتاجين اسبوع بعيد عن اى ضغوط عصبية وحتاجين شوية بدايل
مثل
اقراص اسمها افيل دى اقراص لعلاج الحساسية بس لها تاثير منوم كمان وكمان بترفع ضغط الدم ففى اول تلت ايام هتلاقى نفسك عندك هبوط وصداع ومتوتر فندارى العرض ده بالافيل هيخليك تنام شوية
وهيرفع الضغط شوية بس هيكون للمعدل الطبيعى لان النيكوتين اللى كنا بناخده فى السيجارة وقف وده كان بيرفع لنا الضغط يبقى علشان نتحاشى الهبوط هناخد الافيل
مرة كل 12ساعة فى التلت ايام الاول ونتحاشى قيادة السيارة فى الايام دى
- كمان عاوزين نوقف الكافايين وده مهم جدا فى الاقلاع عن التدخين مرة واحدة نوقفهم مع بعض ------ طيب هنستبدل النيكوتين والكافايين بايه؟
هنستبدلهم بنوع قهوة موجود فى كل الهايبر ماركت زى كارفور كده النوع ده قهوة بدون كافيين وكمان معاها هناخد بلاك شيكوليت وهى شيكولاته غامقة بدون سكر ودى ممكن تساعد المدخنين من مرضى السكر
-يبقى اول تلت ايام عاوزين قهوة بدون كافيين +شيكولاته بلاك + كولا (دايت لمرضى السكر) وخدو بالكم التلت مواد دول لهم نفس تاثير السجاير والشيكولاته عامة اسمها مأكول السعادة مهمة للحالة المزاجية للمخ وعاوزين مشروبات كتير وعصاير طبيعية
-هتشعر بالام فى جسمك وانك هتتجن على سيجارة بس اكملو يا ابطال لا عاشت ولا كانت حتة سيجارة تستعبدنا
- واذا فكرنا بان فى بيت من بيوت المسلمين يكون فقير ممكن ينفق عليه تمن السجاير دى فى الشهر هنستحى من الله ان ندخن
اقولكم معلومة التبغ ده كانو بيدوه للخيول والحيوانات علشان ينشطوها وخلوها فى سركم احسن الحيوانات تقول علينا بنقلدهم
-فى اعراض جانبية ممكن تظهر من انقطاع النيكوتين فى اول كام يوم ممكن التغلب عليها بسهولة حتى لو قضيت اول تلت ايام نائم على ما يرجع جسمك يفرز الاندورفينات بتاعته لو فى شعور بالهبوط هناخد ايفورتيل حبوب – ولو فى شعور بالالم ممكن ناخد بانادول
- اه بس وانت ماشى شمين ريحة سيجارة مع واحد بيدخن هاتجن وادخن انا كمان لالالالالالالالالالالالا انا قوية الارادة وهواصل
- بعد شوية شفت فى التليفزيون حد بيدخن اه ياربى عاوزة سيجارة دلوقت لالالالالالالالا انا خلاص قررت
- قعدت بعدها وسط مدخنين وقلت الحمد لله اللذى عافانا مما ابتلاهم به وفضلنا على كثير ممن خلق تفضيلا
- احبتى فى الله
انا تحت امر من يرغب فى انى اساعده فى اول اسبوع من الاقلاع عن التدخين بس بشرط
نخلى تمن السجاير صدقة جارية لفقراء المسلمين اللى ربنا هيسالنا عنهم
- وطبعا مش هوصيكم الياضة مهمة جدا للصحة العامة وقرات كتاب عن اهمية الشى اكدو فيه ان المشى من اهم الرياضات وان فى مواد لا تفرز من المخ الا اثناء المشى والطبيب العالمى مجدى يعقوب يوصى بالمشى كاهم الرياضات لعضلة القلب
- وقارنو بين حد بيمارس الرياضة وغير مدخن وبين مدخن وطبعا لا يمارس الرياضة لان المدخن بياخد نفسه بالعافية يبقى هيلعب ريا ضة ازاى ولو الاتنين فى سن واحد هيبقى المدخن يبان عليه انه اكبر فى السن من الرياضى الغير مدخن على الاقل عشر سنين
- اللهم متعناباسماعنا وابصارنا وقواتنا ابدا ما احييتنا
- إِنَّ السَّمْعَ وَالْبَصَرَ وَالْفُؤَادَ كُلُّ أُولـئِكَ كَانَ عَنْهُ مَسْؤُولاً -------- لو اصابنا مرض بسبب التدخين ماذا نقول لله عز وجل يوم العرض عليه ؟؟؟؟؟؟؟؟؟
